Paralajmërim i shkencëtarëve: “Mos pini ujë nga shishet plastike!”
Ekziston rrezik nga shishet plastike dhe, më konkretisht, nga cilësia e ujit që ato përmbajnë. Shkencëtarët ngrenë alarmin dhe paralajmërojnë për shmangien e përdorimit të shisheve plastike, veçanërisht nga gratë shtatzëna, pasi studimet tregojnë se mikroplastikat, përveçse arrijnë në placentë, mund të përfundojnë edhe në organet e fetusit.
Specialistët rekomandojnë që uji të konsumohet vetëm nga shishe qelqi ose metali, për shkak të frikës në rritje se grimcat mikroskopike plastike mund të dëmtojnë seriozisht shëndetin tonë.
Dr. Luisa Campagnolo, specialiste e histologjisë dhe embriologjisë në Universitetin e Romës Tor Vergata, paralajmëron se ka prova të qarta që mikro dhe nanoplastikat përfundojnë në indet e trupit të njeriut.
Studime të mëparshme kanë treguar se këto grimca mikroskopike – nënprodukte të degradimit të plastikës – mund të hyjnë në qarkullimin e gjakut dhe të arrijnë deri në placentë. Gjithashtu, grimcat plastike që depërtojnë në indet njerëzore mund të ndikojnë në prodhimin e disa hormoneve dhe, si pasojë, në procese të rëndësishme biologjike.
Një studim i ri te minjtë, i prezantuar në konferencën vjetore të Shoqatës Amerikane për Avancimin e Shkencës, tregon se plastika e konsumuar mund të përfundojë në organet e fetusit.
Shishet plastike njëpërdorimshe që përdorim çdo ditë mund të çlirojnë mbetje, veçanërisht kur ekspozohen ndaj rrezeve të diellit. Sipas Dr. Campagnolo, konsumimi i ujit të ambalazhuar në shishe të tilla duhet shmangur.
«Mendoj se duhet të shmangim çdo material plastik njëpërdorimësh që bie në kontakt me ushqimin, si enët plastike në mikrovalë. Duhet të kthehemi te gota prej qelqi», thekson ajo.
Dr. Filippos Demokritou, specialist i nanoshkencës dhe inxhinierisë mjedisore në Universitetin Rutgers në Nju Xhersi, i cilësoi gjetjet e fundit nga studimet në kafshë si “shumë shqetësuese”.
Sipas studimit të tij, i botuar në revistën shkencore Nanomaterials, vërtetohet për herë të parë se plastika e konsumuar mund të kalojë te fetusi.«Ne zbulojmë mikro dhe nanoplastika në placentë vetëm 24 orë pas gëlltitjes së tyre nga kafshët shtatzëna. Më shqetësuesja është se i gjetëm në çdo organ të fetusit, gjë që tregon ndikime të mundshme në zhvillim», deklaroi ai.
Siç thekson Dr. Demokritou, plastikat me bazë nafte nuk janë të biodegradueshme. Kushtet atmosferike dhe foto-oksidimi i shpërbëjnë ato në fragmente mikroskopike – të ashtuquajturat mikro dhe nanoplastika – të cilat tashmë janë zbuluar në mushkëritë e njeriut, në placentë dhe në gjak, duke ngritur shqetësime serioze për shëndetin publik.
Ai shton se mikroplastikat janë një ndotës në zhvillim, për të cilin ende ka shumë të panjohura.
«Konsumimi i rreth pesë gramëve mikro dhe nanoplastika në javë është i barabartë me gëlltitjen e një karte krediti. Nuk mund të kthehemi në Epokën e Gurit, por si shoqëri duhet të jemi më të zgjuar dhe të adoptojmë zgjidhje të qëndrueshme. Shkencëtarët, shoqëria dhe autoritetet rregullatore duhet të rishikojnë mënyrën se si prodhojmë dhe përdorim materialet dhe kimikatet», përfundon ai.
